ఏపీలో పెన్షన్లు కోల్పోయిన వారికి భారీ శుభవార్త..! విధివిధానాలు జారీ..!. | AP Pensions Reverification Guidelines 2025
రాష్ట్రంలో పెన్షన్ల తొలగింపుతో మనస్తాపానికి గురైన వేలాదిమంది పెన్షన్ లబ్దిదారులుకు ఇది నిజంగా శుభవార్త అనే చెప్పాలి. కూటమి ప్రభుత్వం అధికారంలోకి వచ్చిన తర్వాత, పెన్షన్ల జాబితాలను ప్రక్షాళన చేయగా, అనర్హులతో పాటు పొరపాటున కొంతమంది అర్హులు కూడా తొలగింపునకు గురయ్యారన్న విషయం తెలిసిందే. దీనిపై ప్రజాప్రతినిధులు, ప్రజల నుండి వచ్చిన విజ్ఞప్తుల మేరకు ప్రభుత్వం సానుకూలంగా స్పందించింది. తాజాగా, గతంలో తొలగించిన ఆరోగ్య పెన్షన్, దివ్యాంగుల పెన్షన్ లబ్దిదారుల విషయంలో మరోసారి పరిశీలన చేసి, అర్హులైన వారికి వెంటనే పెన్షన్ సొమ్ము అందించేందుకు కీలకమైన మార్గదర్శకాలను విడుదల చేసింది. ఇది రాష్ట్రంలోని వేలాది కుటుంబాలకు పెద్ద ఊరట.
ఈ ఏడాది జనవరి నెలలో రాష్ట్ర ప్రభుత్వం పెన్షన్ లబ్దిదారులు యొక్క అర్హతను పరిశీలించేందుకు ప్రత్యేక కార్యక్రమం చేపట్టింది. ఈ పునఃపరిశీలనలో భాగంగా, ప్రభుత్వ ఆస్పత్రుల్లో జనవరి 6వ తేదీ నుండి లబ్దిదారులను పరీక్షించారు. మొత్తం 23,352 ఆరోగ్య పెన్షన్లు, 5.22 లక్షల దివ్యాంగుల పెన్షన్లను తిరిగి పరిశీలించారు. ఈ పరిశీలనలో అనర్హులుగా తేలిన వారికి నోటీసులు కూడా పంపారు. అయితే, ఎవరైనా తాము అర్హులమని భావిస్తే, అప్పీలు చేసుకునేందుకు ప్రభుత్వం అప్పట్లో అవకాశం కల్పించింది. ఇప్పుడు ఆ అప్పీలు చేసుకున్న వారిని తిరిగి పరిశీలించి, పెన్షన్ పునఃపరిశీలన ప్రక్రియను పారదర్శకంగా పూర్తి చేసేందుకు సిద్ధమైంది.
ప్రభుత్వం జారీ చేసిన మార్గదర్శకాల ప్రకారం, గతంలో తొలగింపునకు గురైన ఆరోగ్య, దివ్యాంగ పెన్షన్ లబ్దిదారులు అప్పీలు చేసుకుని ఉంటే, వారి వివరాలను సచివాలయాల వారీగా పరిశీలన కోసం నిర్దిష్ట తేదీలను కేటాయించనున్నారు. ఈ బాధ్యతను ఎంపీడీవోలు, మున్సిపల్ కమిషనర్లకు అప్పగించారు. జిల్లా స్థాయిలో డీసీహెచ్ఎస్ (DCHS), మెడికల్ సూపరింటెండెంట్ల సహకారంతో లబ్దిదారులను ఆయా ఆస్పత్రులకు మ్యాప్ చేస్తారు. అంటే, లబ్దిదారులు ఏ తేదీల్లో, ఏ ఆస్పత్రికి వెళ్లాలో తేదీలను ఖరారు చేస్తారు. ఈ సమాచారాన్ని సచివాలయాలకు అందిస్తారు.
ఈ సమాచారం అందిన వెంటనే పంచాయతీ కార్యదర్శులు, వార్డు అడ్మిన్ కార్యదర్శులు అప్పీలు చేసుకున్న పెన్షన్ లబ్దిదారులుకి పరిశీలన కోసం తేదీలను కేటాయిస్తూ నోటీసులు జారీ చేస్తారు. ఇప్పటికే ఈ నోటీసుల పంపిణీ మొదలయింది. ముఖ్యంగా, ఈ నెల 8వ తేదీ (బుధవారం) నుంచి సచివాలయాల్లో పెన్షన్ల పరిశీలన ప్రక్రియ ప్రారంభమవుతుంది. ప్రతి వారం బుధ, గురు, శుక్రవారాల్లో మాత్రమే సచివాలయాల్లో ఈ పరిశీలన కొనసాగుతుంది. అయితే, ఆరోగ్య పెన్షన్ లబ్దిదారులు మాత్రం తప్పనిసరిగా కేటాయించిన తేదీల్లో ఆస్పత్రులకు వెళ్లి తమ వైద్య పరీక్షలు చేయించుకోవాల్సి ఉంటుంది. ఎవరైనా లబ్దిదారులు నోటీసు తీసుకోకపోయినా, పరిశీలనకు హాజరుకాకపోయినా వారి పెన్షన్‌ను పెండింగ్‌లో ఉంచుతారు. ఈ పూర్తి పెన్షన్ పునఃపరిశీలన తర్వాత, అర్హుల జాబితాను ఖరారు చేసి, వారికి పెన్షన్ సొమ్మును అందించేందుకు ప్రభుత్వం చర్యలు తీసుకోనుంది. ప్రభుత్వం తీసుకున్న ఈ నిర్ణయం, వాస్తవంగా అవసరమైన వారికి చేదోడుగా నిలవాలనే సంకల్పాన్ని స్పష్టం చేస్తోంది.
