పెన్షన్ రావాలంటే వెంటనే ఈ జీవన్ ప్రమాణ్ సమర్పించండి! పూర్తి విధానం ఇక్కడ | Jeevan Praman Digital Life Certificate Submission Process 2025
నవంబర్ వచ్చిందంటే పెన్షనర్లకు గుర్తొచ్చేది జీవన్ ప్రమాణ్! తమ పెన్షన్ నిరాటంకంగా అందుకోవాలంటే, ప్రతి ఏటా నవంబర్ నెలలో డిజిటల్ లైఫ్ సర్టిఫికెట్ (Digital Life Certificate) లేదా జీవన్ ప్రమాణ్ను తప్పనిసరిగా సమర్పించాలి. ఇది కేంద్ర, రాష్ట్ర ప్రభుత్వాల నుంచి పెన్షన్ పొందుతున్న వారికి, ఇతర ప్రభుత్వ రంగ సంస్థల రిటైర్డ్ ఉద్యోగులకు కూడా వర్తిస్తుంది. ఈ సర్టిఫికెట్ సమర్పించిన తర్వాతే పెన్షన్ పంపిణీ చేసే ఏజెన్సీలు పెన్షన్ను బ్యాంక్ ఖాతాలో జమ చేస్తాయి.
అయితే, వయోవృద్ధులైన పెన్షనర్లకు ఇక్కడ కొద్దిగా వెసులుబాటు ఉంది. 80 ఏళ్లు పైబడిన వారికి ప్రతి సంవత్సరం అక్టోబర్ 1వ తేదీ నుంచి నవంబర్ 30వ తేదీ వరకు (దాదాపు రెండు నెలల సమయం) జీవన్ ప్రమాణ్ సమర్పించేందుకు అవకాశం ఉంటుంది. మిగిలిన పెన్షనర్లంతా నవంబర్ 1 నుంచి 30 లోపు దీనిని పూర్తి చేయాల్సి ఉంటుంది.
జీవన్ ప్రమాణ్ సమర్పించేందుకు పెన్షనర్లు తమ సౌలభ్యాన్ని బట్టి ఆఫ్లైన్ (భౌతిక) లేదా ఆన్లైన్ (డిజిటల్) పద్ధతుల్లో దేనినైనా ఎంచుకోవచ్చు. దీని కోసం ముందుగా కొన్ని ముఖ్యమైన వివరాలను సిద్ధంగా ఉంచుకోవాలి: అవి- ఆధార్ నంబర్, మొబైల్ నంబర్, పీపీఓ (PPO) నంబర్, బ్యాంక్ ఖాతా నంబర్, అలాగే పెన్షన్ మంజూరు చేసే అథారిటీ పేరు.
ఆఫ్లైన్ ద్వారా సమర్పించాలనుకుంటే, పెన్షనర్లు నేరుగా తమ బ్యాంక్ బ్రాంచ్కు లేదా సిటిజన్ సర్వీస్ సెంటర్కు (CSC) వెళ్లి భౌతిక ధ్రువీకరణ పత్రాన్ని సమర్పించవచ్చు. ఒకవేళ బయటకు వెళ్లలేని వారికి, ఇండియా పోస్ట్ పేమెంట్ బ్యాంక్ (IPPB) ద్వారా డోర్స్టెప్ బ్యాంకింగ్ సేవ అందుబాటులో ఉంది. ఈ సర్వీస్ను ఉపయోగించి ఐపీపీబీ కస్టమర్లు మరియు నాన్-ఐపీపీబీ కస్టమర్లు కూడా ఇంటి వద్ద నుంచే లైఫ్ సర్టిఫికెట్ను సమర్పించవచ్చు.
ఆన్లైన్ లేదా డిజిటల్ పద్ధతి మరింత సులభమైంది. పెన్షనర్లు జీవన్ ప్రమాణ్ అధికారిక వెబ్సైట్ను ఉపయోగించి తమ పర్సనల్ కంప్యూటర్, ల్యాప్టాప్ లేదా మొబైల్ ద్వారా కూడా ఈ సర్టిఫికెట్ను సమర్పించవచ్చు. ఇక్కడ గుర్తుంచుకోవాల్సిన విషయం ఏమిటంటే, ఆధార్ నంబర్ ఆధారంగా బయోమెట్రిక్ ధ్రువీకరణ తప్పనిసరి. మరో మార్గం- ఉమంగ్ (UMANG) యాప్. ఈ యాప్ను డౌన్లోడ్ చేసుకుని, అందులో జీవన్ ప్రమాణ్ అని సెర్చ్ చేసి, ఆపై ‘జనరేట్ లైఫ్ సర్టిఫికెట్’పై క్లిక్ చేయాలి. పెన్షనర్ అథెంటికేషన్ పేజీలో అవసరమైన సమాచారం నమోదు చేసి, బయోమెట్రిక్ ద్వారా ధ్రువీకరించుకోవచ్చు.
ఈ జీవన్ ప్రమాణ్ (డిజిటల్ లైఫ్ సర్టిఫికెట్) ఐటీ చట్టం ప్రకారం చట్టబద్ధంగా చెల్లుబాటు అవుతుంది. ఇది పెన్షనర్ తాను బతికే ఉన్నారని రుజువు చేసేందుకు, నేరుగా హాజరుకాకుండానే లైఫ్ సర్టిఫికెట్ సమర్పించేందుకు వీలు కల్పిస్తుంది. సరైన సమయంలో జీవన్ ప్రమాణ్ సమర్పించి, మీ పెన్షన్ ప్రయోజనాలను నిరాటంకంగా పొందండి.
